کراچی میں گیس اور بجلی کی طویل لوڈشیڈنگ نے لاکھوں شہریوں کے لیے عید الاضحیٰ کی خوشیوں کو ہولناک امتحان میں تبدیل کر دیا ہے۔ شدید گرمی اور حبس کے اس پورے سیزن
میں گیس اور بجلی کی آنکھ مچولی کے باعث شہریوں کو عید کے پانچوں دن شدید مشکلات کا سامنا کرنا پڑا، جس کی وجہ سے قربانی کا گوشت سنبھالنا اور کھانا پکانا
بھی محال ہو گیا۔ عید کے تمام ایام میں مختلف علاقوں سے گیس پریشر نہ ہونے کی مسلسل شکایات سامنے آئیں، جہاں شہریوں کا کہنا تھا کہ گیس کا پریشر اتنا کم تھا کہ عید کی مہمان نوازی کے لیے کھانا پکانا تو دور، چائے کے لیے پانی ابالنا بھی ممکن نہیں تھا۔
دوسری جانب، بلاتعطل فراہمی کے دعووں کے برعکس شہر کے متعدد علاقوں میں طویل لوڈشیڈنگ کا سلسلہ عید کے دوران چوبیس گھنٹے جاری رہا۔ مختلف علاقوں کے رہائشیوں نے شکایت کی کہ عید کے ان دنوں میں بجلی کی گھنٹوں بندش کے باعث فریج میں رکھا قربانی کا گوشت خراب ہونے لگا اور شدید گرمی میں پنکھے بند ہونے سے بچے اور بڑے بلبلا اٹھے۔ یوٹیلٹی کمپنیوں کی اس بدترین کارکردگی اور نااہلی پر کراچی کے شہریوں نے شدید غم و غصے کا اظہار کیا ہے جنہیں عید کی تعطیلات میں ریلیف کے بجائے بدترین ذہنی اذیت کا سامنا کرنا پڑا۔
