ترجمان کے مطابق سائٹ بی پولیس نے نان کسٹم پیڈ موبائل فونز کی اسمگلنگ کی بڑی کوشش کو ناکام بناتے ہوئے کرولا کار میں سوار ایک ملزم نعمت اللہ ولد حاجی لالا کو دفعہ 54 ضابطہ فوجداری کے تحت گرفتار کر لیا ہے۔ پولیس نے کارروائی کے دوران گاڑی کے مختلف خفیہ خانوں میں چھپا کر اسمگل کیے جانے والے 137 قیمتی موبائل فونز برآمد کیے، جن میں 27 آئی فونز اور 110 اینڈرائیڈ موبائل فونز شامل ہیں۔ پولیس حکام کا کہنا ہے کہ برآمد کیے جانے والے ان فونز کی مالیت ایک کروڑ روپے سے زائد بتائی جاتی ہے۔
ترجمان نے تفصیلات بتاتے ہوئے مزید بتایا کہ ابتدائی تحقیقات کے مطابق یہ موبائل فونز براستہ بلوچستان ایک مسافر بس کے ذریعے اسمگل کر کے کراچی کے علاقے یوسف گوٹھ بس ٹرمینل پہنچائے گئے تھے۔ ملزم ان موبائل فونز کو بس ٹرمینل سے کرولا کار کے ذریعے مقامی موبائل مارکیٹ منتقل کرنے کی کوشش کر رہا تھا کہ پولیس نے بروقت اور کامیاب چھاپہ مار کارروائی کرتے ہوئے اسمگلنگ کا یہ نیٹ ورک ناکام بنا دیا۔
سائٹ بی پولیس نے کارروائی کے بعد برآمد کیے جانے والے تمام موبائل فونز اور اسمگلنگ میں استعمال ہونے والی کار کو زیر دفعہ 550 ضابطہ فوجداری کے تحت اپنے قبضے میں لے لیا ہے۔ پولیس حکام کے مطابق گرفتار ملزم اور برآمد شدہ سامان کو مزید قانونی چارہ جوئی اور تفتیش کے لیے باقاعدہ طور پر کسٹم حکام کے حوالے کر دیا گیا ہے۔
