کراچی کے انتہائی حساس اور متمول علاقے ڈیفنس فیز 8 میں پولیس کے اعلیٰ افسر، ایس ایس پی عرفان سموں کے بنگلے پر ڈکیتی کی ایک بڑی واردات پیش آئی ہے۔ ایس ایس پی عرفان سموں کے مطابق، مسلح ڈاکو گھر میں داخل ہوئے اور انہوں نے وہاں موجود اہلخانہ کو اسلحے کے زور پر یرغمال بنا لیا، جس کے بعد وہ گھر سے قیمتی سامان لوٹ کر باآسانی فرار ہونے میں کامیاب ہو گئے۔
پولیس حکام نے واقعے کی تصدیق کرتے ہوئے بتایا ہے کہ یہ سنگین واردات گزشتہ رات پیش آئی جس میں 4 مسلح ملزمان ملوث تھے۔ واقعے کے وقت ایس ایس پی عرفان سموں بنگلے پر موجود نہیں تھے۔ پولیس کی انویسٹی گیشن اور کرائم سین ٹیموں نے جائے وقوعہ کا معائنہ کر کے شواہد اکٹھے کر لیے ہیں۔ حکام کا دعویٰ ہے کہ واردات میں ملوث ملزمان سے متعلق اہم اور ٹھوس شواہد حاصل کر لیے گئے ہیں اور انہیں بہت جلد گرفتار کر کے قانون کے کٹہرے میں لایا جائے گا۔
