وفاقی وزیر مواصلات عبدالعلیم خان نے سندھ میں جاری نیشنل ہائی وے اتھارٹی (این ایچ اے) کے منصوبوں کو جلد مکمل کرنے کی ہدایت جاری کر دی ہے۔ یہ ہدایات کراچی میں این ایچ اے کے ریجنل دفتر کے دورے کے دوران ایک اعلیٰ سطحی اجلاس میں دی گئیں۔
اجلاس میں سندھ بھر میں جاری اور زیر التوا منصوبوں کا تفصیلی جائزہ لیا گیا، جہاں حکام نے مختلف شاہراہوں اور موٹرویز پر ہونے والی پیش رفت سے آگاہ کیا۔ وزیر مواصلات نے واضح کیا کہ ترقیاتی منصوبوں میں کسی قسم کی تاخیر برداشت نہیں کی جائے گی اور متعلقہ ادارے مقررہ وقت میں کام مکمل کریں۔
حکام کے مطابق اس موقع پر خصوصی ٹیمیں بنانے کی منظوری بھی دی گئی، جو سندھ میں ہائی وے سے متعلق مسائل کو فوری حل کریں گی۔ اجلاس میں N-5، N-55، N-120، N-110 اور M-6 موٹروے سمیت اہم منصوبوں پر بھی غور کیا گیا۔
عبدالعلیم خان نے ہدایت دی کہ عوام کو بہتر سفری سہولیات فراہم کرنے کے لیے سڑکوں اور پلوں کی مرمت اور توسیع کے کام کو ترجیح دی جائے۔ اس کے ساتھ ساتھ ٹول پلازوں کے نظام کو بھی جدید بنانے اور یکساں ڈیزائن اپنانے پر زور دیا گیا تاکہ سفر میں آسانی پیدا ہو۔
اجلاس میں مالی امور، ٹول ٹیکس نظام اور وسائل کے مؤثر استعمال کا بھی جائزہ لیا گیا، جبکہ سیکیورٹی اور انتظامی رکاوٹوں کو دور کرنے کے لیے اقدامات پر بات کی گئی۔ مزید برآں، ایم-6 موٹروے کے لیے جدید طرز کے کنٹریکٹ اور پروکیورمنٹ سسٹم متعارف کرانے پر بھی زور دیا گیا تاکہ منصوبے اعلیٰ معیار کے مطابق مکمل ہو سکیں۔
حکام کا کہنا ہے کہ ان اقدامات کا مقصد سندھ میں انفراسٹرکچر کو بہتر بنانا اور عوام کو محفوظ اور آسان سفری سہولیات فراہم کرنا ہے، جبکہ منصوبوں کی بروقت تکمیل کو یقینی بنایا جائے گا۔
