ذرائع کے مطابق، چین کے جنوبی اور وسطی صوبوں میں طوفانی بارشوں اور اس کے نتیجے میں آنے والے ہولناک سیلاب اور مٹی کے تودے گرنے (Landsliding) کے واقعات میں کم از کم 21 افراد ہلاک اور درجنوں لاپتہ ہو گئے ہیں۔ گزشتہ چند روز سے جاری مسلسل بارشوں نے وسیع پیمانے پر تباہی مچائی ہے، جس کے باعث ندی نالوں میں طغیانی آ گئی ہے اور کئی بستیوں اور زرعی زمینوں کو شدید نقصان پہنچا ہے۔
چینی حکام کے مطابق، بارشوں کے اس حالیہ اسپیل سے سب سے زیادہ متاثر جنوبی اور وسطی خطے ہوئے ہیں، جہاں سیلابی ریلے اپنے ساتھ مکانات، گاڑیاں اور بجلی کے کھمبے بہا لے گئے، جس کی وجہ سے متعدد شہروں اور دیہاتوں کا مواصلاتی اور بجلی کا نظام مکمل طور پر مفلوج ہو کر رہ گیا ہے۔ مقامی انتظامیہ نے اب تک متاثرہ علاقوں سے ہزاروں افراد کو محفوظ مقامات پر منتقل کر دیا ہے، جبکہ ریڈ الرٹ جاری کرتے ہوئے فوج اور امدادی ٹیموں کو ہائی الرٹ پر رکھا گیا ہے۔ چینی محکمہ موسمیات نے خبردار کیا ہے کہ آنے والے دنوں میں بارشوں کا یہ سلسلہ مزید شدت اختیار کر سکتا ہے، جس سے سیلابی صورتحال مزید ابتر ہونے کا خدشہ ہے۔
