ویٹیکن میں ایسٹر کے موقع پر خطاب کرتے ہوئے پوپ لیو ۱۴ نے عالمی رہنماؤں پر زور دیا ہے کہ وہ جاری جنگوں کا خاتمہ کریں اور طاقت، تسلط اور فتح کی پالیسیوں کو ترک کر دیں۔
اپنے خصوصی "اربی اور اوربی” پیغام میں پوپ لیو نے کہا کہ دنیا بھر میں جاری تنازعات انسانیت کے لیے خطرہ بن چکے ہیں اور لوگوں میں تشدد کے حوالے سے بے حسی بڑھتی جا رہی ہے۔ انہوں نے عالمی طاقتوں کو مخاطب کرتے ہوئے کہا کہ جو لوگ ہتھیار رکھتے ہیں وہ انہیں رکھ دیں اور جو جنگ چھیڑنے کی طاقت رکھتے ہیں وہ امن کا راستہ اختیار کریں۔
پوپ لیو نے اپنے خطاب میں کسی مخصوص جنگ کا نام نہیں لیا، تاہم انہوں نے واضح کیا کہ موجودہ عالمی حالات انتہائی تشویشناک ہیں اور انسانیت کو تباہی کے دہانے پر لے جا رہے ہیں۔ انہوں نے کہا کہ ایسٹر کا پیغام امن، برداشت اور عدم تشدد ہے، جسے دنیا بھر میں اپنانے کی اشد ضرورت ہے۔
عالمی ماہرین کے مطابق پوپ کا یہ بیان ایسے وقت میں سامنے آیا ہے جب مشرق وسطیٰ سمیت دنیا کے مختلف خطے شدید کشیدگی اور جنگی صورتحال کا سامنا کر رہے ہیں۔ پوپ لیو حالیہ دنوں میں مسلسل جنگوں کے خلاف آواز بلند کر رہے ہیں اور عالمی رہنماؤں سے مذاکرات کے ذریعے مسائل حل کرنے پر زور دے رہے ہیں۔
انہوں نے اس بات پر بھی زور دیا کہ مذہب کو جنگ یا تشدد کے جواز کے طور پر استعمال نہیں کیا جانا چاہیے، بلکہ اسے امن اور انسانیت کی بھلائی کے لیے استعمال کیا جانا چاہیے۔
