کراچی کی شاہ لطیف پولیس نے خفیہ معلومات پر ایک کامیاب اور بڑی کارروائی کرتے ہوئے لاکھوں روپے مالیت کی اعلیٰ کوالٹی کی چرس برآمد کر کے 3 بین الصوبائی منشیات فروشوں کو دھر لیا ہے۔
پولیس حکام کے مطابق گرفتار ملزمان کی شناخت عظمت خان، اختر منیر اور عمران گل کے ناموں سے ہوئی ہے۔ ملزمان نے منشیات کی اسمگلنگ کے لیے انوکھا طریقہ اپنا رکھا تھا اور وہ 24 کلو چرس کو ایک رکشے کے اندر بنے خفیہ خانوں میں چھپا کر شہر کے مختلف حصوں میں سپلائی کے لیے لے جا رہے تھے کہ پولیس نے ناکہ بندی کے دوران انہیں پکڑ لیا۔
ابتدائی تفتیش کے دوران گرفتار ملزمان نے سنسنی خیز انکشافات کرتے ہوئے بتایا کہ یہ منشیات پشاور سے کراچی لائی گئی تھی، جسے شہرِ قائد کے مختلف اضلاع میں چھوٹے بڑے منشیات فروشوں کو فروخت کیا جانا تھا۔ ملزمان کراچی میں منشیات فروشی کا ایک انتہائی منظم اور خفیہ نیٹ ورک چلا رہے تھے۔
پولیس نے کارروائی کے دوران 24 کلو اعلیٰ کوالٹی کی چرس، ملزمان کے موبائل فونز، نقدی اور سپلائی میں استعمال ہونے والا رکشہ بھی اپنے قبضے میں لے لیا ہے۔ ملزمان کے خلاف نارکوٹکس ایکٹ کے تحت مقدمہ درج کر کے انہیں مزید سخت تفتیش کے لیے انویسٹی گیشن ونگ کے حوالے کر دیا گیا ہے۔
