کراچی میں سندھ حکومت نے بائیکرز کے لیے پیٹرول سبسڈی پورٹل متعارف کروا دیا ہے، جس کے ذریعے موٹر سائیکل مالکان ماہانہ 2,000 روپے کی سبسڈی حاصل کر سکتے ہیں۔ پورٹل پر درخواست دینے کا مقصد بائیکرز کو مالی سہولت فراہم کرنا اور انہیں آسانی سے سبسڈی تک رسائی دینا ہے۔
سبسڈی کے لیے درخواست دہندگان کو اپنا کمپیوٹرائزڈ نیشنل شناختی کارڈ (CNIC)، بینک اکاؤنٹ نمبر اور موٹر سائیکل کی رجسٹریشن دستاویزات اپ لوڈ کرنی ہوں گی۔ درخواست جمع کروانے کے بعد سبسڈی براہِ راست بینک اکاؤنٹ میں منتقل کی جائے گی۔ سندھ بینک صارفین کو رقم 24 گھنٹے میں جبکہ دیگر بینک صارفین کو 3 دن کے اندر موصول ہوگی۔
حکام نے بتایا کہ سبسڈی صرف اپنی نام پر رجسٹرڈ موٹر سائیکل کے لیے دی جائے گی۔ شہریوں کے لیے پورٹل استعمال کرنا آسان بنایا گیا ہے اور کسی قسم کی مشکل یا سوال کے لیے ہیلو لائن 634-374-111-021 بھی دستیاب ہے۔
پروگرام کا آغاز ایسے وقت میں ہوا ہے جب ملک میں پیٹرول کی قیمتوں میں اضافہ ہوا ہے، جس سے شہریوں کے روزمرہ آمد و رفت کے اخراجات بڑھ گئے ہیں۔ صوبائی حکومت نے اس اسکیم کے لیے تقریباً 13.4 ارب روپے مختص کیے ہیں اور پورے سندھ میں درخواستیں وصول کی جا رہی ہیں۔
