جنگ ختم ہو تو عالمی معیشت تیزی سے سنبھل سکتی ہے، آئی ایم ایف

بین الاقوامی مالیاتی فنڈ کی سربراہ کرسٹالینا جارجیوا نے کہا ہے کہ اگر مشرقِ وسطیٰ میں جاری جنگ آئندہ دو ہفتوں کے اندر ختم ہو جائے تو عالمی معیشت کی تیز رفتار بحالی اب بھی ممکن ہے۔

اپنے بیان میں انہوں نے کہا کہ اگر موسمِ گرما تک جنگ اور اس کے اثرات جاری رہے تو عالمی معیشت کو مزید مشکلات کا سامنا کرنا پڑ سکتا ہے۔ ان کے مطابق موجودہ صورتحال میں عالمی منڈیوں میں تیل اور گیس کی فراہمی شدید متاثر ہوئی ہے۔

آئی ایم ایف سربراہ نے بتایا کہ عالمی معیشت میں اس وقت تقریباً 20 فیصد تیل اور گیس کی کمی محسوس کی جا رہی ہے، جس کے باعث توانائی کی قیمتوں اور سپلائی چین پر دباؤ بڑھ رہا ہے۔

انہوں نے خبردار کیا کہ اگر یہ خلل برقرار رہا تو معیشت کے لیے حالات مزید خراب ہو سکتے ہیں، جبکہ جنگ کے جلد خاتمے کی صورت میں بحالی کے امکانات موجود ہیں۔

یہ بیان ایسے وقت میں سامنے آیا ہے جب مشرقِ وسطیٰ میں کشیدگی کے باعث عالمی منڈیوں میں غیر یقینی صورتحال برقرار ہے اور توانائی کے شعبے پر اس کے اثرات واضح طور پر دیکھے جا رہے ہیں۔