رپورٹ کے مطابق، وفاقی دارالحکومت اسلام آباد سے پیٹرول اور ہائی اسپیڈ ڈیزل کی قیمتوں میں شامل لیوی، ٹیکسز اور مختلف مارجنز کی ہوش ربا تفصیلات منظرِ عام پر آ گئی ہیں، جس کے تحت عوام کو فی لیٹر ایندھن پر بھاری اضافی رقم ادا کرنی پڑ رہی ہے۔ سرکاری دستاویزات سے واضح ہوا ہے کہ حکومت کی جانب سے ایک لیٹر پیٹرول پر مجموعی طور پر 118 روپے 76 پیسے جبکہ ایک لیٹر ہائی اسپیڈ ڈیزل پر 110 روپے 65 پیسے لیوی، ٹیکس اور مختلف مارجنز کی مد میں وصول کیے جا رہے ہیں۔

دستاویزات کے مطابق، ایک لیٹر پیٹرول کی بنیادی لاگت 178 روپے 77 پیسے بنتی ہے، تاہم حکومت نے شہریوں کے لیے فی لیٹر قیمت 297 روپے 53 پیسے مقرر کر رکھی ہے۔ اس قیمت کے اندر 70 روپے 36 پیسے پیٹرولیم لیوی، 5 روپے کلائمیٹ سپورٹ لیوی، 19 روپے 33 پیسے کسٹمز ڈیوٹی، 6 روپے 86 پیسے ان لینڈ فریٹ ایکولائزیشن مارجن، 7 روپے 87 پیسے آئل مارکیٹنگ کمپنیوں کا مارجن اور 8 روپے 64 پیسے ڈیلرز مارجن شامل ہے۔ اسی طرح، فی لیٹر ہائی اسپیڈ ڈیزل کی بنیادی لاگت 198 روپے 85 پیسے ہے، لیکن عوام کے لیے اس کی فروخت کی قیمت 309 روپے 50 پیسے فی لیٹر مقرر کی گئی ہے، جس پر مجموعی طور پر 110 روپے 65 پیسے کے اضافی ٹیکسز اور مارجنز وصول کیے جا رہے ہیں۔