کراچی کے علاقے بلدیہ ٹاؤن میں حب ریور روڈ پر انصاف بوٹ مارکیٹ کے قریب واقع ایک پلاسٹک کے گودام میں اچانک ہولناک آگ لگ گئی ہے۔
گودام میں پلاسٹک کا سامان موجود ہونے کے باعث آگ نے دیکھتے ہی دیکھتے شدت اختیار کر لی اور علاقے میں دھویں کے گہرے بادل چھا گئے۔
واقعے کی اطلاع ملتے ہی ایدھی ایمبولینسز اور ریسکیو ٹیمیں فوری طور پر موقع پر پہنچ گئیں اور علاقے میں امدادی کارروائیوں کا آغاز کر دیا۔
فائر بریگیڈ کی گاڑیاں بھی جائے وقوعہ پر پہنچ چکی ہیں اور فائر فائٹرز کی جانب سے آگ پر قابو پانے کے لیے مسلسل کوششیں کی جا رہی ہیں۔
ریسکیو ذرائع کے مطابق فوری طور پر کسی جانی نقصان کی اطلاع نہیں ملی ہے، تاہم گودام میں موجود لاکھوں روپے مالیت کا سامان جلنے کا خدشہ ہے۔
