ایف آئی اے کارپوریٹ ٹریفکنگ ونگ (CTW) کراچی نے شارع فیصل پر واقع عوامی مرکز پاسپورٹ آفس میں بڑی کارروائی کرتے ہوئے اسسٹنٹ ڈائریکٹر فاروق سیال کو حراست میں لے لیا ہے۔
گرفتار اسسٹنٹ ڈائریکٹر پر جعلی پاکستانی دستاویزات کی بنیاد پر غیر قانونی طور پر افغان باشندوں کے پاکستانی پاسپورٹ بنانے کا سنگین الزام ہے۔
کارروائی کے دوران پاسپورٹ آفس کے ریکارڈ کی تفصیلی جانچ پڑتال کی گئی جس کے نتیجے میں 70 سے زائد غیر ملکی افراد کے پاسپورٹ بنانے کی دستاویزات اور فائلیں برآمد ہوئیں۔
حکام کے مطابق ان مشکوک دستاویزات پر بنائے جانے والے پاسپورٹس کا تعلق مبینہ طور پر افغان شہریوں سے ہے، جس کی مزید باریک بینی سے جانچ کی جا رہی ہے۔
ایف آئی اے نے اسسٹنٹ ڈائریکٹر کے خلاف مقدمہ درج کر کے نیٹ ورک میں شامل دیگر سہولت کاروں اور ایجنٹوں کی گرفتاری کے لیے تفتیش کا دائرہ وسیع کر دیا ہے۔
