کراچی کے معروف ہل پارک کے قریب تجاوزات کے خلاف اینٹی انکروچمنٹ سیل نے ایک اہم آپریشن کیا ہے۔ بدھ کی صبح سویرے کی گئی اس کارروائی میں پہاڑی کے دامن کو کاٹ کر بنائے گئے پلاٹ پر کھڑی غیر قانونی باؤنڈری وال اور تعمیرات کو مسمار کر دیا گیا۔ حکام کے مطابق یہ آپریشن سٹی میئر بیرسٹر مرتضیٰ وہاب کی خصوصی ہدایات پر کیا گیا جس کا مقصد ہل پارک کے ارد گرد تمام ناجائز قبضوں کو ختم کر کے عوامی اراضی کو واگزار کرانا ہے۔
دوسری جانب، انتظامی سطح پر بھی ایک سخت اقدام اٹھاتے ہوئے کراچی میٹروپولیٹن کارپوریشن (KMC) کے لینڈ ڈیپارٹمنٹ کے ڈپٹی ڈائریکٹر محمد نعمان کو ملازمت سے معطل کر دیا گیا ہے۔ ان پر الزام ہے کہ انہوں نے ہل پارک کے حساس علاقے میں تعمیرات کے لیے غیر قانونی طور پر "نو ابجیکشن سرٹیفکیٹ” (NOC) جاری کیا تھا۔ حکام نے ان کے خلاف باضابطہ چارج شیٹ داخل کرنے اور تادیبی کارروائی شروع کرنے کا فیصلہ کیا ہے۔ مقامی رہائشیوں نے اس آپریشن کا خیرمقدم کیا ہے تاہم انہوں نے خدشہ ظاہر کیا ہے کہ اگر مستقل بنیادوں پر مسماری نہ کی گئی تو تعمیراتی سرگرمیاں دوبارہ شروع ہو سکتی ہیں
