صدر مملکت آصف علی زرداری نے عالمی یومِ انسدادِ تمباکو نوشی کے موقع پر اپنے خصوصی پیغام میں تمباکو اور نکوٹین مصنوعات کو عوامی صحت کے لیے ایک سنگین خطرہ قرار دیا ہے۔ انہوں نے زور دے کر کہا کہ نئی اور نوجوان نسل کو نکوٹین کی لت سے محفوظ رکھنا ہماری اہم قومی ذمہ داری ہے۔ صدر زرداری نے روایتی تمباکو نوشی کے ساتھ ساتھ جدید رجحانات جیسے ای سگریٹ، ویپنگ ڈیوائسز اور نکوٹین پاؤچز کے بڑھتے ہوئے استعمال پر بھی گہری تشویش کا اظہار کیا۔
اپنے پیغام میں صدر مملکت نے پارلیمنٹ اور تمام صوبائی اسمبلیوں سے اس حوالے سے مؤثر اور جامع قانون سازی کرنے کا مطالبہ کیا۔ انہوں نے واضح کیا کہ تمباکو نوشی کے خلاف موجودہ قوانین پر سختی سے عمل درآمد وقت کی ضرورت ہے اور انسانی زندگیوں سے کھیلنے والے موت کے سوداگروں کے خلاف سخت ترین قوانین بنانا ناگزیر ہو چکا ہے۔ صدر آصف علی زرداری نے والدین، اساتذہ اور سماجی رہنماؤں پر بھی زور دیا کہ وہ اس آگاہی مہم میں اپنا فعال کردار ادا کریں، کیونکہ ایک صحت مند پاکستان کی تعمیر کے لیے تمباکو سے پاک معاشرے کا قیام بے حد ضروری ہے۔
