کراچی کے پوش علاقے ڈیفنس فیز 8 میں سیکیورٹی گارڈ کی فائرنگ سے ایک کمسن بچہ زخمی ہو گیا، پولیس نے بروقت کارروائی کرتے ہوئے ملزم کو گرفتار کر لیا ہے۔
تفصیلات کے مطابق تھانہ ساحل کی حدود میں ڈیفنس فیز 8 کے خیابانِ شاہین پر ایک نجی سیکیورٹی گارڈ کی جانب سے فائرنگ کی گئی، جس کے نتیجے میں وہاں موجود ایک بچہ گولی لگنے سے زخمی ہو گیا۔ پولیس حکام کا کہنا ہے کہ گولی بچے کی ٹانگ میں لگی ہے، جسے فوری طور پر طبی امداد کے لیے اسپتال منتقل کر دیا گیا ہے۔
پولیس نے موقع پر پہنچ کر فائرنگ کرنے والے سیکیورٹی گارڈ کو حراست میں لے کر اس کے قبضے سے اسلحہ برآمد کر لیا ہے۔ پولیس کے مطابق واقعے کی تفتیش کی جا رہی ہے کہ فائرنگ کن حالات میں ہوئی اور کیا گارڈ کا اسلحہ لائسنس یافتہ تھا یا نہیں۔ ڈیفنس کے رہائشیوں نے واقعے پر شدید تشویش کا اظہار کرتے ہوئے سیکیورٹی کمپنیوں کے گارڈز کی سخت مانیٹرنگ کا مطالبہ کیا ہے۔
