کراچی کے علاقے منگھوپیر چونگی ناکہ کے قریب ایک تیز رفتار واٹر ٹینکر نے موٹر سائیکل کو زوردار ٹکر مار دی، جس کے نتیجے میں افسوسناک حادثہ پیش آیا۔
ریسکیو حکام کے مطابق واٹر ٹینکر کی ٹکر اتنی شدید تھی کہ موٹر سائیکل سوار ایک شخص موقع پر ہی جاں بحق ہو گیا جبکہ دوسرا شدید زخمی ہے۔
حادثے کی اطلاع ملتے ہی ریسکیو ٹیموں نے موقع پر پہنچ کر متوفی کی لاش اور زخمی شخص کو فوری طور پر عباسی شہید اسپتال منتقل کیا۔
ریسکیو ذرائع کا کہنا ہے کہ جاں بحق ہونے والے شخص کی عمر لگ بھگ 50 سال ہے، تاہم اس کی فوری شناخت ممکن نہیں ہو سکی ہے۔
حادثے میں شدید زخمی ہونے والے دوسرے شخص کی شناخت 40 سالہ اکمل ولد اعظم کے نام سے ہوئی ہے، جس کی حالت تشویشناک بتائی جاتی ہے۔
