شکارپور کے علاقے میان جو گوٹھ لنک روڈ پر باراتیوں کی بس کو پیش آنے والے المناک حادثے میں ایک بچے سمیت 8 افراد جاں بحق اور دولہا دلہن سمیت 26 افراد زخمی ہو گئے۔ خوشیاں ماتم میں تبدیل ہو گئیں۔
پولیس حکام کا کہنا ہے کہ باراتیوں سے بھری بس بلوچستان کے شہر اوستہ محمد سے میرپور برڑو جا رہی تھی کہ میان جو گوٹھ کے مقام پر اچانک بس کا ٹائی راڈ ٹوٹ گیا۔ ٹائی راڈ ٹوٹنے کے باعث ڈرائیور بس پر کنٹرول نہ رکھ سکا اور گاڑی بے قابو ہو کر گہری کھائی میں جا گری۔
حادثے کی اطلاع ملتے ہی پولیس اور مقامی افراد نے جائے وقوعہ پر پہنچ کر امدادی کارروائیاں شروع کیں اور لاشوں و زخمیوں کو بس سے نکال کر فوری طور پر قریبی اسپتال منتقل کیا۔ اسپتال انتظامیہ کے مطابق زخمیوں میں خواتین اور بچے بھی شامل ہیں، جن میں سے چند کی حالت تشویشناک بتائی جا رہی ہے۔ پولیس نے حادثے کا شکار ہونے والی بس کو قبضے میں لے کر واقعے کی مزید تحقیقات شروع کر دی ہیں۔
