جی ایچ کیو (GHQ) راولپنڈی میں ’معرکہ حق‘ اور بھارت کے خلاف آپریشن ’بنیان المرصوص‘ کی تاریخی کامیابی کا ایک سال مکمل ہونے پر ایک پُر وقار تقریب منعقد کی گئی۔ چیف آف ڈیفنس فورسز اور آرمی چیف فیلڈ مارشل سید عاصم منیر نے تقریب سے خطاب کرتے ہوئے دشمن کو خبردار کیا کہ پاکستان کے خلاف کسی بھی قسم کی جارحیت کے نتائج "انتہائی دردناک اور دور رس” ہوں گے۔
ایک تاریخی کامیابی فیلڈ مارشل عاصم منیر نے کہا کہ پچھلے سال مئی میں ہونے والی 87 گھنٹوں کی مختصر مگر فیصلہ کن جنگ میں دشمن کو ذلت آمیز شکست کا سامنا کرنا پڑا۔ اس معرکے کے دوران پاک فضائیہ کے شاہینوں نے بھارت کے 8 جدید ترین لڑاکا طیارے، بشمول فرانسیسی ساختہ رافیل، مار گرائے اور درجنوں ڈرونز کو تباہ کیا۔ فیلڈ مارشل نے واضح کیا کہ آج پاکستان کا دفاع ناقابلِ تسخیر بن چکا ہے اور قوم کی متحد دیوار کسی بھی بیرونی خطرے کو خاک میں ملانے کی صلاحیت رکھتی ہے۔
تقریب کے آغاز پر فیلڈ مارشل عاصم منیر، ایئر چیف مارشل سدھو اور ایڈمرل اشرف نے یادگارِ شہداء پر پھول چڑھائے اور سلامی پیش کی۔ فیلڈ مارشل نے معرکہ حق کے دوران جامِ شہادت نوش کرنے والے نہتے شہریوں، خواتین اور بچوں کی قربانیوں کو بھی بھرپور خراجِ عقیدت پیش کیا۔
