بھارتی کرکٹ بورڈ (BCCI) نے انڈین پریمیئر لیگ (IPL) کے دوران نظم و ضبط کی مسلسل خلاف ورزیوں کا سخت نوٹس لیتے ہوئے کھلاڑیوں اور فرنچائز مالکان کے لیے ایک جامع اور سخت ہدایت نامہ جاری کر دیا ہے، جس کا اطلاق فوری طور پر ہوگا۔
تفصیلات کے مطابق: بھارتی میڈیا کی رپورٹ کے مطابق، آئی پی ایل میں ‘کوڈ آف کنڈکٹ’ کی متعدد خلاف ورزیوں کے بعد بی سی سی آئی نے 8 صفحات پر مشتمل ایک مفصل حکم نامہ تمام ٹیموں کو ارسال کیا ہے۔ بورڈ کے اینٹی کرپشن اینڈ سکیورٹی یونٹ (ACSU) نے نشاندہی کی ہے کہ حالیہ میچز کے دوران کھلاڑیوں کی نجی زندگی، ‘گرل فرینڈ کلچر’ اور غیر متعلقہ افراد کی ٹیم ہوٹلز میں بلا روک ٹوک آمد و رفت سے سکیورٹی پروٹوکولز متاثر ہو رہے ہیں۔
حکم نامے کے اہم نکات اور پابندیاں:
- ہوٹل پروٹوکول: اب سے کوئی بھی غیر متعلقہ شخص یا مہمان کھلاڑی کے ہوٹل کے کمرے میں نہیں جا سکے گا۔ مہمانوں سے ملاقات صرف ہوٹل کی مخصوص کردہ جگہ (Lobby) پر ہوگی، وہ بھی ٹیم منیجر کو پہلے سے مطلع کرنے کے بعد۔
- ڈگ آؤٹ کی حدود: میچ کے دوران ڈگ آؤٹ میں موجود فرنچائز مالکان یا ان کے نمائندے کھلاڑیوں سے کسی قسم کی گفتگو نہیں کر سکیں گے۔ پی ایم او اے (PMOA) پروٹوکولز کی خلاف ورزی پر فرنچائز مالکان کو بھی جوابدہ بنایا جائے گا۔
- نقل و حرکت پر نظر: کھلاڑیوں کے لیے ہوٹل سے باہر جانے سے قبل سکیورٹی اور ٹیم منیجر کو آگاہ کرنا لازمی قرار دیا گیا ہے۔
- ویپ (Vape) پر پابندی: بورڈ نے ہوٹل اور ڈریسنگ روم کے قریبی علاقوں میں ویپ پینے اور غیر متعلقہ افراد کی غیر ضروری نقل و حرکت پر مکمل پابندی عائد کر دی ہے۔
بی سی سی آئی نے واضح کیا ہے کہ ان تمام پروٹوکولز کا مقصد کرکٹ کی ساکھ کو بچانا اور کھلاڑیوں کو کرپشن یا کسی بھی ناخوشگوار واقعے سے دور رکھنا ہے۔ بورڈ نے خبردار کیا ہے کہ مستقبل میں ان احکامات کی معمولی سی خلاف ورزی بھی برداشت نہیں کی جائے گی اور ملوث افراد کے خلاف سخت تادیبی کارروائی عمل میں لائی جائے گی۔
