راؤ انوار کا دھماکہ خیز انٹرویو: "الطاف حسین جس سے ناراض ہوتے تھے، وہ قتل ہو جاتا تھا”

سابق پولیس افسر راؤ انوار نے ایک حالیہ پوڈ کاسٹ میں کراچی کے ماضی کے پرتشدد حالات اور ایم کیو ایم کے بانی الطاف حسین کے حوالے سے سنگین الزامات عائد کر دیے ہیں۔

سابق ایس ایس پی ملیر راؤ انوار نے، جو خود بھی ماضی میں کئی تنازعات کا شکار رہے ہیں، اپنے انٹرویو میں دعویٰ کیا کہ اس دور میں سیاسی ماحول اس قدر خوفناک تھا کہ ایم کیو ایم کے بانی کی ناراضگی کا مطلب کسی شخص کا قتل ہونا ہوتا تھا۔ انہوں نے مزید کہا کہ ایم کیو ایم اور پولیس کے درمیان دشمنی اس حد تک بڑھ چکی تھی کہ کئی بے گناہ پولیس کانسٹیبلز کو جان بوجھ کر نشانہ بنایا گیا۔

راؤ انوار کے مطابق، "ہماری ان سے کبھی نہیں بنی،” جس کی وجہ سے شہر میں امن و امان کی صورتحال برسوں تک خراب رہی۔ ان کے ان بیانات نے ایک بار پھر کراچی کی 90 کی دہائی کی سیاست اور پولیس آپریشنز کی یاد تازہ کر دی ہے۔ سیاسی تجزیہ کاروں کا کہنا ہے کہ راؤ انوار کے یہ بیانات ماضی کے ان تصفیہ طلب معاملات کو دوبارہ سامنے لائے ہیں جن پر آج بھی مختلف آراء پائی جاتی ہیں۔