امریکی وزارتِ دفاع نے ان خبروں کو سختی سے مسترد کر دیا ہے کہ ایران آبنائے ہرمز میں امریکی مفادات کو نقصان پہنچانے کے لیے سمندری جانوروں بالخصوص ڈولفنز کو خودکش حملوں کے لیے استعمال کر رہا ہے۔
پینٹاگون میں ہونے والی ایک پریس بریفنگ کے دوران جب وزیرِ دفاع پیٹ ہیگستھ سے ایرانی "کامیکازی ڈولفنز” کے بارے میں سوال کیا گیا تو انہوں نے اسے محض ایک افواہ قرار دیا۔ انہوں نے واضح کیا کہ امریکہ اس وقت تزویراتی خطرات پر توجہ مرکوز کیے ہوئے ہے نہ کہ ایسی غیر مستند خبروں پر۔ بریفنگ میں بتایا گیا کہ خطے میں ایران اور امریکہ کے درمیان جنگ بندی کا معاہدہ انتہائی نازک صورتحال میں ہے، تاہم تجارتی جہازوں کی بحفاظت ترسیل کے لیے امریکی بحریہ کا آپریشن جاری ہے۔
دفاعی تجزیہ کاروں کا ماننا ہے کہ اس طرح کی افواہیں مشرقِ وسطیٰ میں جاری شدید تناؤ اور غیر یقینی صورتحال کا نتیجہ ہیں۔ امریکی حکام نے اس عزم کا اعادہ کیا ہے کہ وہ آبنائے ہرمز میں بحری آمد و رفت کو کسی بھی قیمت پر بند نہیں ہونے دیں گے اور ایران سے منسلک گروہوں کی جانب سے کسی بھی اشتعال انگیزی کا بھرپور جواب دیا جائے گا۔
