لاہور: قومی ایئرلائن پی آئی اے نے بڑھتی ہوئی فضائی ایندھن کی قیمتوں کے باعث بڑا فیصلہ کرتے ہوئے تمام کرایوں پر دی جانے والی رعایتیں ختم کر دیں اور کئی بین الاقوامی پروازوں کو محدود یا معطل کرنے کا اعلان کیا ہے۔
ترجمان پی آئی اے کے مطابق اب صرف بچوں اور شیر خوار بچوں کے لیے رعایت برقرار رکھی گئی ہے جبکہ دیگر تمام کیٹیگریز کے لیے ڈسکاؤنٹس ختم کر دیے گئے ہیں۔
حکام کا کہنا ہے کہ ایندھن کی قیمتوں میں مسلسل اضافے، خاص طور پر مشرق وسطیٰ کی کشیدہ صورتحال کے باعث، ایئرلائن کے آپریشنل اخراجات میں نمایاں اضافہ ہوا ہے، جس کے بعد یہ سخت فیصلے ناگزیر ہو گئے۔
پی آئی اے نے بیجنگ اور کوالالمپور کی پروازیں بالترتیب 11 اور 14 اپریل سے معطل کرنے کا اعلان کیا ہے، جبکہ خلیجی ممالک کے لیے بھی کئی پروازیں محدود کر دی جائیں گی، سوائے متحدہ عرب امارات اور سعودی عرب کے، جہاں محدود آپریشن جاری رہے گا۔
اس کے علاوہ ایئرلائن نے اخراجات کم کرنے کے لیے مزید اقدامات بھی کیے ہیں، جن میں جہاز کو رن وے تک ایک انجن پر لے جانا، کیٹرنگ کو مسافروں کی تعداد کے مطابق محدود کرنا، اور غیر ضروری وزن کم کرنا شامل ہے۔
