اسلام آباد: وزیراعظم شہباز شریف نے ملک بھر میں الیکٹرک وہیکلز (ای وی) کے استعمال کو فروغ دینے پر زور دیتے ہوئے کہا ہے کہ اس اقدام سے نہ صرف ایندھن کے اخراجات میں کمی آئے گی بلکہ ملکی معیشت کو بھی سہارا ملے گا۔
وزیراعظم نے اسلام آباد ٹریفک پولیس کو ماحول دوست الیکٹرک گاڑیوں کی فراہمی کی تقریب سے خطاب کرتے ہوئے کہا کہ عالمی سطح پر تیل کی قیمتوں میں اضافے اور خطے کی موجودہ صورتحال کے پیش نظر پاکستان کو فوری طور پر توانائی کے متبادل ذرائع کی جانب منتقل ہونا ہوگا۔
انہوں نے کہا کہ الیکٹرک گاڑیاں نہ صرف پیٹرول اور ڈیزل کے استعمال کو کم کریں گی بلکہ قیمتی زرمبادلہ کی بچت میں بھی اہم کردار ادا کریں گی۔ وزیراعظم کے مطابق حکومت چاہتی ہے کہ یہ ماڈل تمام صوبوں اور قانون نافذ کرنے والے اداروں تک پھیلایا جائے تاکہ توانائی کی بچت کو یقینی بنایا جا سکے۔
حکام نے بریفنگ میں بتایا کہ ابتدائی طور پر 15 الیکٹرک گاڑیاں متعارف کرائی گئی ہیں جو ایک بار چارج ہونے پر 350 سے 400 کلومیٹر تک سفر کر سکتی ہیں، جبکہ فاسٹ چارجنگ ایک سے ڈیڑھ گھنٹے میں مکمل ہو جاتی ہے۔
مزید بتایا گیا کہ ان گاڑیوں کے استعمال سے ماہانہ لاکھوں روپے کی بچت ممکن ہے اور چند ماہ میں ان کی لاگت بھی پوری ہو سکتی ہے۔
