پی ڈی ایم اے (PDMA) سندھ نے صوبے میں حالیہ بارشوں اور طوفانی صورتحال کے نتیجے میں ہونے والے جانی و مالی نقصانات کی تفصیلی رپورٹ جاری کر دی ہے۔ رپورٹ کے مطابق صوبے بھر میں بارشوں اور مختلف حادثات کے باعث اب تک 16 افراد جاں بحق اور 96 زخمی ہو چکے ہیں۔
ڈی جی پی ڈی ایم اے کی فراہم کردہ تفصیلات کے مطابق نقصانات کی تفصیل درج ذیل ہے:
شہید بینظیرآباد: 6 مرد اور 4 خواتین جاں بحق، جبکہ 32 افراد زخمی ہوئے۔
کشمور: 2 مرد اور 1 عورت جاں بحق، جبکہ 9 افراد زخمی ہوئے۔
گھوٹکی: ایک خاتون جاں بحق اور 54 افراد زخمی ہونے کی اطلاع ہے۔
تھرپارکر: آسمانی بجلی گرنے کے واقعے میں ایک خاتون جاں بحق ہوئی۔
قمبر: بارش اور گرج چمک کے دوران ایک معمر خاتون جاں بحق ہوئیں۔
ڈی جی پی ڈی ایم اے نے مزید بتایا کہ سندھ کے متاثرہ اضلاع میں ریسکیو اور امدادی سرگرمیاں تیزی سے جاری ہیں اور صورتحال کی مسلسل نگرانی کی جا رہی ہے۔ تمام متعلقہ ضلعی انتظامیہ اور امدادی اداروں کو ہدایت کی گئی ہے کہ وہ متاثرہ علاقوں میں امدادی کاموں کا جائزہ لیں اور ضلعی ڈیزاسٹر مینجمنٹ اتھارٹیز کو کسی بھی ہنگامی صورتحال سے نمٹنے کے لیے مکمل الرٹ رہنے کا حکم دیا گیا ہے۔
