ذرائع کے مطابق جامعہ کراچی میں اساتذہ کی جانب سے امتحانات کے بائیکاٹ کے فیصلے کے خلاف اسلامی جمعیت طلبہ کے زیرِ اہتمام طلباء و طالبات نے شدید احتجاجی مظاہرہ کیا ہے۔ جامعہ کے مختلف شعبہ جات سے تعلق رکھنے والے طلباء نے امتحانات کی منسوخی پر شدید غصے کا اظہار کرتے ہوئے جامعہ انتظامیہ اور اساتذہ تنظیم کے خلاف نعرے بازی کی اور امتحانات کے فوری انعقاد کا مطالبہ کیا۔
احتجاج میں شریک طلباء و طالبات کا کہنا تھا کہ یہاں تعلیم کو مذاق بنا دیا گیا ہے اور ایسا لگتا ہے کہ یہ انتظامیہ قوم کو پڑھانا ہی نہیں چاہتی۔ مظاہرین نے شکوہ کیا کہ طلباء امتحانات کی تیاری کے لیے راتوں کو جاگ کر پڑھتے ہیں، مہنگا پیٹرول خرچ کر کے اور شدید گرمی کے باوجود جامعہ پہنچتے ہیں، لیکن یہاں آ کر معلوم ہوتا ہے کہ پیپر کینسل کر دیا گیا ہے۔ طلباء کا کہنا تھا کہ اگر کلاسز میں حاضری پوری نہ ہو تو اساتذہ پیپر میں بیٹھنے نہیں دیتے، لیکن اب جب طالبعلم پوری تیاری کر چکے ہیں تو اساتذہ نے خود ہی امتحانات کا بائیکاٹ کر دیا۔
مظاہرین نے مزید کہا کہ انہوں نے بارشوں، شدید گرمی، سردی اور رمضان المبارک کے مہینے میں بھی باقاعدگی سے جامعہ آ کر کلاسز لی ہیں، ایسے میں امتحانات کینسل کر کے طلباء کے مستقبل اور محنت کے ساتھ سراسر ناانصافی کی گئی ہے۔ اسلامی جمعیت طلبہ کے رہنماؤں نے مطالبہ کیا ہے کہ اساتذہ اور انتظامیہ اپنے اندرونی مسائل کو مذاکرات کے ذریعے حل کریں اور طلباء کا تعلیمی سال ضائع کیے بغیر فوری طور پر امتحانات کا شیڈول بحال کیا جائے۔
