ریاض — پاکستانی وزیر اعظم شہباز شریف اور سید عاصم منیر نے سعودی ولی عہد شہزادہ محمد بن سلمان سے اہم ملاقات کی جس کی تصاویر بھی میڈیا کو جاری کر دی گئی ہیں۔
سرکاری ذرائع کے مطابق اس ملاقات میں خطے کی مجموعی صورتحال، سیکیورٹی امور اور باہمی تعاون پر تبادلہ خیال کیا گیا۔ ذرائع کا کہنا ہے کہ ملاقات میں پاکستان اور سعودی عرب کے درمیان دفاعی اور سٹریٹجک تعاون کو مزید مضبوط بنانے کے امکانات پر بھی تبادلہ خیال کیا گیا۔
جاری کردہ تصاویر میں فیلڈ مارشل عاصم منیر کو پاکستانی فوج کی وردی میں دیکھا جا سکتا ہے جسے بعض مبصرین غیر معمولی قرار دے رہے ہیں۔ عام طور پر عسکری قیادت غیر ملکی دوروں کے دوران رسمی لباس پہنتی ہے تاہم اس ملاقات میں بعض حلقے وردی کو خطے کی سلامتی کی صورتحال اور پاکستان اور سعودی عرب کے درمیان یکجہتی کی علامت قرار دے رہے ہیں۔
ذرائع کے مطابق اس موقع پر سعودی وزیر دفاع اور فیلڈ مارشل عاصم منیر کے درمیان خطے میں جاری کشیدگی بالخصوص ایران سے متعلق صورتحال پر بھی تبادلہ خیال کیا گیا۔
تجزیہ کاروں کا کہنا ہے کہ پاکستان اور سعودی عرب کے قریبی تعلقات خطے کی سیاست اور سلامتی میں اہم کردار ادا کرتے ہیں اور اس ملاقات کو اسی تناظر میں دیکھا جا رہا ہے۔
