کراچی ٹریفک پولیس کی جانب سے سال 2025ء اور 2026ء کے ابتدائی پانچ مہینوں (جنوری تا مئی) کے دوران پیش آنے والے ٹریفک حادثات کے اعداد و شمار کا ایک اہم موازنہ جاری کیا گیا ہے، جس کے مطابق شہر میں حادثات اور ان کے نتیجے میں ہونے والے جانی نقصان میں واضح کمی دیکھی گئی ہے۔
ٹریفک پولیس حکام کی جانب سے جاری کردہ تقابلی رپورٹ کی تفصیلات درج ذیل ہیں:
ٹریفک حادثات کے کیسز: رواں سال کے ابتدائی 5 ماہ کے دوران شہر بھر میں ٹریفک حادثات کے مجموعی طور پر 296 کیسز رپورٹ ہوئے، جو گزشتہ سال (2025ء) کے اسی عرصے میں 391 تھے، اس طرح حادثات کے مجموعی کیسز میں 24.3 فیصد کی نمایاں کمی ریکارڈ کی گئی ہے۔
جانی نقصان (اموات): ان پانچ مہینوں میں حادثات کے نتیجے میں 322 افراد جان کی بازی ہار گئے، جبکہ گزشتہ سال اسی عرصے کے دوران اموات کی یہ تعداد 418 تھی، جس کے مطابق اموات کی شرح میں 22.97 فیصد کی واضح کمی واقع ہوئی ہے۔
زخمیوں کی تعداد: حکام کے مطابق حادثات کے دوران زخمی ہونے والے افراد کی تعداد بھی نمایاں حد تک کم ہو کر 502 رہ گئی ہے، جو کہ گزشتہ سال کے انہی پانچ مہینوں میں 752 ریکارڈ کی گئی تھی۔
