اسلام آباد: حکومت نے توانائی بچت اور موجودہ معاشی صورتحال کے پیش نظر ایک اہم فیصلہ کرتے ہوئے ملک بھر میں (سندھ کے علاوہ) کاروباری اوقات کار محدود کرنے کا اعلان کر دیا ہے، جس کا اطلاق 7 اپریل سے ہوگا۔
نئے فیصلے کے مطابق روزمرہ استعمال کی دکانیں، شاپنگ مالز اور ڈیپارٹمنٹل اسٹورز رات 8 بجے بند کر دیے جائیں گے، جبکہ بیکریز، ریسٹورنٹس اور شادی ہالز کو رات 10 بجے تک کھلا رکھنے کی اجازت دی گئی ہے۔
حکومتی ذرائع کے مطابق اس اقدام کا مقصد بجلی اور ایندھن کی بچت کو یقینی بنانا ہے، کیونکہ ملک کو اس وقت توانائی کے شدید بحران اور بڑھتی ہوئی قیمتوں کا سامنا ہے۔ حکام کا کہنا ہے کہ کاروباری اوقات محدود کرنے سے بجلی کے استعمال میں نمایاں کمی آئے گی اور قومی معیشت پر دباؤ کم ہوگا۔
مزید بتایا گیا ہے کہ اس فیصلے کا اطلاق فوری طور پر سندھ کے علاوہ تمام صوبوں میں ہوگا، جبکہ سندھ حکومت اس حوالے سے علیحدہ پالیسی مرتب کرے گی۔
تاجروں کی جانب سے اس فیصلے پر ملا جلا ردعمل سامنے آیا ہے۔ بعض کاروباری افراد نے اسے معیشت کے لیے ضروری قرار دیا ہے، جبکہ دیگر کا کہنا ہے کہ کم اوقات کار سے کاروبار متاثر ہو سکتا ہے، خاص طور پر وہ دکانیں جو رات کے وقت زیادہ فروخت کرتی ہیں۔
