میئر کراچی مرتضیٰ وہاب کی صدر کی موبائل مارکیٹ میں آتشزدگی کے دوران ریسکیو آپریشن کی ذاتی نگرانی

کراچی کی صدر موبائل مارکیٹ میں پیش آنے والے آتشزدگی کے واقعے کے دوران میئر کراچی مرتضیٰ وہاب نے موقع پر پہنچ کر ریسکیو اور فائر فائٹنگ آپریشن کی ذاتی طور پر نگرانی کی۔ کراچی موبائل الیکٹرانکس ڈیلرز ایسوسی ایشن کے صدر محمد منہاج گلوان نے بتایا کہ فائر بریگیڈ، کے ایم سی، ریسکیو اداروں اور دیگر متعلقہ محکموں کی بروقت کارروائی کے باعث آگ پر مکمل قابو پا لیا گیا۔ ان کے مطابق فائر بریگیڈ کی ٹیمیں تین سے چار منٹ میں موقع پر پہنچ گئیں، جس کے نتیجے میں ایک بڑے سانحے سے بچاؤ ممکن ہوا۔ واقعے کے وقت عمارت میں موجود دو سے ڈھائی سو افراد کو بحفاظت ریسکیو کر لیا گیا، جبکہ کسی قسم کے جانی نقصان یا زخمی ہونے کی اطلاع موصول نہیں ہوئی۔ منہاج گلوان نے انتظامیہ، فائر بریگیڈ اور مارکیٹ انتظامیہ کے فائر سیفٹی انتظامات کو سراہتے ہوئے کہا کہ لاکھوں روپے مالیت کا نقصان اور قیمتی انسانی جانیں محفوظ رہیں۔ واقعے کے بعد کولنگ کا عمل جاری رہا اور صورتحال مکمل طور پر قابو میں رہی۔