ممبئی / نیویارک: ہالی ووڈ میں اپنی اداکاری کا لوہا منوانے والی معروف بھارتی اداکارہ پریانکا چوپڑا نے طویل عرصے بعد بالی ووڈ چھوڑنے کی اصل وجہ بتا دی ہے، جس نے مداحوں کو حیران کر دیا۔
بھارتی میڈیا رپورٹس کے مطابق ایک حالیہ انٹرویو میں پریانکا چوپڑا نے انکشاف کیا کہ وہ کبھی بھی بالی ووڈ چھوڑنا نہیں چاہتی تھیں، لیکن حالات اور دباؤ کی وجہ سے انہیں یہ فیصلہ کرنا پڑا۔
اداکارہ نے بتایا کہ وہ بھارت میں کام جاری رکھنا چاہتی تھیں، مگر انہیں خود کو محدود محسوس ہو رہا تھا اور بطور فنکار مزید دلچسپ اور مختلف مواقع کی تلاش تھی۔ انہوں نے کہا کہ انہیں ایسے مواقع کی تلاش تھی جو ان کی صلاحیتوں کو مزید نکھار سکیں، جس کے باعث انہوں نے امریکا میں کام شروع کیا۔
انٹرویو کے دوران انہوں نے بالی ووڈ سے ہالی ووڈ تک اپنے سفر پر بھی تفصیل سے بات کی اور بتایا کہ یہ فیصلہ اچانک نہیں بلکہ دستیاب مواقع اور پیشہ ورانہ ترقی کو مدنظر رکھتے ہوئے کیا گیا۔
کئی برس بھارتی فلم انڈسٹری میں کامیاب کیریئر گزارنے کے بعد پریانکا چوپڑا نے ہالی ووڈ میں قدم رکھا اور متعدد بین الاقوامی منصوبوں میں اپنی صلاحیتوں کا لوہا منوایا۔
فی الحال اداکارہ بھارت میں معروف ہدایتکار کے نئے پروجیکٹ کی شوٹنگ میں مصروف ہیں، جبکہ اپنی نئی فلم ’دی بلف‘ کی پروموشن بھی جاری رکھے ہوئے ہیں۔
43 سالہ اداکارہ نے کہا کہ وہ خوش ہیں کہ اب انہیں اپنی پسند کے مطابق دونوں انڈسٹریز میں کام کرنے کی آزادی حاصل ہے۔ انہوں نے مزید کہا کہ بھارت واپس آ کر کام کرنا ان کے لیے خوشی کا باعث ہے اور وہ بالی ووڈ اور ہالی ووڈ دونوں میں کام سے لطف اندوز ہوتی ہیں۔
